鐵騎會館

 找回密碼
 註冊
搜索
查看: 55481|回復: 206

(分享)26新手 灰色之道

[複製鏈接]
發表於 17-5-2012 00:14:55 | 顯示全部樓層 |閱讀模式
眼見現時學習駕駛電單車既朋友越黎越多,電單車又越黎越多,相對地新人新車亦引發出種種現象、問題甚至磨擦,小弟係樹想向各位新知舊雨分享一下個人見解,岩聽既岩聽,唔岩聽當我冇講過。

一.學車篇
第一樣梗係學識揸車考個牌先啦,不過唔知點解而家d人好奇怪,去運輸處遞表有野唔明就上網問,租車價錢又上網問,連俾左錢駕駛學院上課程,可唔可以book時間都唔問學院而上網問,真得意
不論考強制定8字路試都好,目標為本,勤加練習,唔好成日諗住游車河呀,約埋一齊練有伴呀咁,浪費時間,真係覺得手車唔掂既,就加鐘再練,謙虛d向導師請教,點解要問佢呀? 上網唔得咩?上網係大把料,不過放料無須負責,資訊有真有假,好心做壞事既尤其多,又如果文字短片可以教識人抯車的話,唔Q駛租車實習,真接去考啦!仲有考到牌既都係呀,以為睇左套「聖經」就技術大進?咪玩啦!

二.買車篇
可能受預繳消費風氣影響,近年又興番學牌出車所謂自學,fine! 無問題,問題係你買架電單車返黎係想點既先?
學車考牌?
返工代步?社交見人?
遊山玩水?搵食工具?
追求速度?純粹玩樂?
挑! 咁麻煩架!
係呀!26設計所限就係咁麻煩
唔同需要有唔同設計以至對車手技術技巧亦有唔同要求
可參考以下,另有選擇心得會稍後再開新篇
http://www.iBike.com.hk/03_knowledges/03/bike_weakness.htm

http://www.iBike.com.hk/03_knowledges/03/choose_bike_rule.htm

唔同46易手車
抯架錦田重工既EK都話車神上身
26買舊車絕對不能掉以輕心
基本上買到好野既機會只有一半以下
點解?
架車好地地做咩放車?
家人反對?賣車還債?
梗係有野整又唔想整
哪哪臨套現送舊迎新啦
買易手車忌貪平
果d一萬幾千有架既並唔係用黎俾新手享受駕駛樂趣
相反可能係惡夢既開始
搵間有口碑信譽既車行
遁序漸進由細排量開始
買年份較新甚至全新車
負擔輕操控易無壓力
好好享受一下新車入手既喜悅仲好啦

三.揀車篇
iBike其實係有關於點揀易手車既報導及教學,請自己去主頁既"知識技術"搵下,我呢度想分享既係咩人用咩車,人人考牌買車既目的都可能有唔同,上篇提過,分享下我點睇

學車考牌
現今自動波綿羊選擇又多又靚,所以有唔少人會選擇"以為"相對地較易pass既a牌 ,但係人係貪心既,面對各式新車既引誘,a牌往往就限制左往後換車既選擇 ,咁好喇,棍牌揀咩車好呢?梗係棍車啦,不過棍車方面最好選擇細排氣量大路牌子既大路街車,有新買新,咁樣就算你唔用自己車考牌,都可以用自己車練習,即使再上番考試車,近似排量同車重對於買車係用黎鍛鍊技術以pass為目的既人絕對有幫助

返工代步

代步車始終都唔建議用fairing或chopper,點解呀 ? 返工有冇車場泊?泊街你放唔放心?花左你心唔心痛?冇位你點算?有位但你架入唔倒?泊上行人路又因為嘈嚇親人被投訴跟手抄埋?泊入後巷又唔夠位掉頭?鎖車都鎖成個字?開車com下下有驚喜等等又頂得住冇?
就上述既情況,綿羊同細街車係較好既選擇,不過唔該低調d,唔好整條響喉嘈到想死,又或者大綿羊整d三尖八角既包圍出黎,呢d搞作對要有周圍泊車既需要黎講簡直係害己害人累街坊
好喇,咩為之大cc咩為之細cc呢? 細佬既愚見400或以下既都算係細cc
返工代步以250左右既馬力同車重最為方便,新牌女士都岩用,所以CB250幾舊都有人買賣,泰仔CBR150及VTR250長期冇荀盤,CB300咁貴都有人買,大鷹皇工商界熱棒,飛鷹初上市時大賣,Downtown一街都係,三陽T2都黎一試市場反應,仲有以前既霸主…各式日羊,都係遊走全港都唔會有問題既代步車款
超四你唔講既? 唔好意思,古董車不在分享之列……

揀車講住咁多先,以後既篇幅亦會再講及

四.裝備篇

頭盔
香港係頭盔規格既管制上相當寬鬆,所以可以買到各式各樣各種款式規格既電單車用頭盔,用邊款咩規格我冇意見,自己對自己負責就得,分享下我用過用緊既

開面帽(又稱3/4)
夏天恩物,不過其實涼快感覺只係黎自塊面,遇著d通風設計不良,甚至係冇通風既,頭頂一樣係熱到出煙既,近年開始有d有下巴保護既開面帽,保護性理論上較好,下一頂帽我都考慮入手(老婆睇唔倒~老婆睇唔倒~老婆睇唔倒~

全罩(Fullface,俗稱大頭佛)
高保護首選,有型有款,因為見唔到樣,能將各位既型仔型女指數以幾何級數提升 ,有人或者會覺得戴除麻煩,熱天又焗,視野又差,咁係因為你買左個設計唔好既頭盔,至於點為之好邊隻好?er......唔方便講喎,總之一分錢一分貨,但最貴又唔係最好咁啦

揭面帽(香港叫開面佛,台灣稱可樂帽)
即現役警察所用類型,睇落好似集兩家之大成,實際上亦係兩頭唔到岸,加上致命缺點 - 重,所以要小心選擇,留意設計上重心分佈,以及扣位既堅固程度,就咁膠勾住果d,算把啦~

另外最想講既係乘客頭盔,做得你乘客段估都唔係你仇人,分分鐘仲係你最愛既人,點解你可以將你個退役頭盔求求其其俾佢戴呢?
記住,不論戴乜款式,衞生都係好重要既,一定要定期清潔,放係通風地方吹下都好吖,唔係一係個seat位底或者尾箱拎出黎...

最後,戴得頭盔既,唔想將來變地中海既,請每天都要
洗頭!洗頭!洗頭!

雨褸

作為一個電單車駕駛者,我覺得雨褸係繼頭盔手套後,第三樣必備品,落雨時固然有用,更有防風、保暖、防汚既作用,相當好用,講真,行車中飛沙走石,我有件靚衫都唔會著黎抯車,冬天件羽絨就更加啦,攞去洗好貴架!
揀選方面,最要留意縫線位有冇貼膠防滲,拉鍊有防水前幅,頸位要高,袖口位要可調節鬆緊以防入風,有人或者覺得d雨褸好鬼肉酸,寧願貴d買名牌雨䄛以至”哥踢士”外套,不過買時要留意有冇上述細節外,仲有兩樣野,一係有冇帽,如果帽係外露不能收摺,頸背就唔入水都裝水,二係外袋袋口或拉鍊防唔防水,係呀,件衫防水,d水由袋口滲入,等於廢既,係買就買薄身冇內裡甚至腋下有拉鍊既,平過冬天款架!

防水心得

除左雨褸,打水戰只要準備充足,一d都唔算麻煩
手套可以揀長身防雨防風防寒果D,效果唔錯,要絕對防水真係用工業用黑色膠手套,買加大size堶控a薄揸車手套或勞工手套
腳可以用鞋套、水鞋(淘寶大量),膠既密頭涼鞋或澗水鞋
最常見既係waterproof既高筒行山鞋,買時留意前腳掌部份不要選透氣網面既,最好一塊過,唔係剔波多或經常屈曲就好快入水,唔駛買好貴架,要千幾蚊既不如直接買對26專用既防水靴好過
雨衭最好揀d衭腳位可以拉鍊上到小腿位方便連鞋著,縫線位要貼膠,衭浪位最好有補強,坊間亦有d行山用防水褲合乎要求,冇咁焗身亦靚仔D
天有不測之風雲,有時冇啦啦落雨咩準備都冇的話,便利雨衣都幫到手嫁, 咩呀,果d薄衣衣一開車大風d就吹爛啦,係,就咁著係面唔駛兩個街口就吹爛,嗱,試下除件面衫出黎,著便利雨衣先,再笠件面衫上去,你冇雨褸件面衫都濕盡嫁喇,而家咁咪吹唔爛頂到下囉,如果你面果件係普通運動風褸,加件便利雨衣打底,即刻就變成一件防水雨褸,再用一蚊同佢買兩個膠袋,連襪笠腳再著番鞋頂住擋,得左!

平地台綿羊仔

作為一件運輸工具,平地台綿羊真係無敵,所以我會視佢為工具放入裝備篇分享,多數既綿羊都可以裝箱,頭盔雨褸車com乜都可以掉晒落去,兩手fingfing行街街,去shopping完一袋二袋又可以勾係平地台車返屋企,開工架生又照放無誤,著對靚鞋又唔怕踢波棍整花,加個風檔又唔驚整污糟件飲衫,西衭短裙都冇問題,真係上車方便落車瀟灑,加上車身又輕又窄又有大架,迫骨位推後巷兩相宜,所以深受工商用家歡迎,對馬路新手黎講因為操作簡易,打油就去拿迫就停,路痴搵路尤其方便,久而久之個個車神上身,左穿右插有如鬧市中既濕水欖核,方便非常
不過,靈活既背後代表穩定性欠佳,面對而家新一代既房車Van仔以至的士係馬力上或者起步都並無任何甜頭,所以我並不否定綿羊仔既實用性,相反我極度推介添,不過要將綿羊仔抯得出神入化而安全係有另一套技巧既,小心!

五.法例篇

法例好多人都好似識,但係度見到好多既討論,大家可能都一時忘形,統統拋諸腦後,加上馬路上見到既種種新人類(我有我自由,理X你感受),係度等我做下衰人啦

道路上既法例大家覺得係保障邊個?廢話! 梗係司機啦!Sorry,我唔同意
其實現代道路既指引同法例都係保障”弱者”
邊個係弱者?有冇玩過鬥獸棋?係以體積斷定既
大車食細車,細車食電單車,電單車食單車,單車食行人
即係話,行人係道路法例上係最受保障既
車既發明初初只係代替馬車
大量生產之後使其比馬車更普及
致使需要訂出規則限制車輛行進以保障行人
而車又愈黎愈多
所以又有分隔行車線黎保障細車
試想像下係冇分隔線既地方行車
電單車係最蝕底既
而行人係紅綠燈、過路輔助線、以至斑馬線都係有優先使用權
有人冇人紅燈綠燈都好,抯車經過點都定速留意兩旁馬路
作好隨時收慢甚至急剎既準備
就算遇到行出馬路既MK妹,推住木頭車既綜援婆婆,係路中心影相既自由行,踩住單車既外賣叔叔,以至富貴逼人既路權人仕
通通都受到保障,亦應該受到保障,因為佢地真係有路權,相反受制既應該係各位了解道路法例,通過技術考試,符合駕駛資格既司機
因為馬路真係佢地讓出黎架!
所以即使你要轉入停車場,鬧巿塞車攝車,停小路等出大路,交通燈剛剛轉燈等等,都要留意同小心馬路兩旁既人或非機動車既動態,切記
戒急用忍
唔同意的話我唔講咁多
你試下搵一個亂過馬路既人黎撞下
阿sir同罰則會話你知點解

六.灰色之道

好喇,終於叫做入正題

點解好似愈黎愈多人用電單車?相信”方便”同”便宜”係好多人心目中既印象,亦因為咁而去買架電單車返黎,諗住又平又方便,誰不知用落先知,原來我地呢個城市對電單車毫無好感,好多設施並無考慮26用家需要,結果反而諸多不便,係呢個時候,接受新一代教育成長既人,相信所有野都要規範化,標準化,冇就要爭取,錯就要批判,動用傳媒暴力,我得唔到既無其他人可以得到先係公平......
其實,我地呢d係殖民地教育下成長既上一代,早已經習慣係各式規範下逆來順受,但又靈活彈性地解決各樣不公平對待,從而帶來新一代無法想像,亦唔會有人教,但係8~90年代發揮得淋灕盡致既所謂街頭智慧,係~而家係2012年,好多野冇得返轉頭,不過放係電單車身上,仍然相當實用。

行車篇

好多人話26係馬路成人俾人蝦,又閘又推咁,有d師兄會龜縮,相信慢就是安全,有d會做cam L,乜7都影低佢之後上網聲討,有d就積極抵抗,你閘咩我頂,你推咩我又頂,總之乜都鬥一餐,又有d迷信馬力就是皇道,冇人係我前面就最安全云云...

其實呢,行車安全與否根本在於你能唔能夠了解其他道路使用者既動態,配合實際路況,放自己係”你睇到人,人睇到你”既位置,並且對其他人、車甚至環境作出觀察並準確預測,做到”讓左佢又唔知,過番佢又唔覺”,制造安全環境。

一早返工路邊多唔多校車?有冇d小學雞或者賓賓跑黎跑去?
記唔記得咩冧把巴士小巴埋邊個站?多唔多人上?駛唔駛cut定出去?
記唔記得燈位幾耐轉燈?離遠見到綠燈應該收油定俾油?
十字路口交通燈邊邊行先?多唔多人衝燈尾?
上到大路三條線行邊條最暢通?
行車線內應該偏左定偏右、同前車距離幾多先唔會咁易俾人閘?
前車係咩車?睇唔睇到司機?食緊煙定講緊電話?啄得前車埋唔埋?
後車有幾遠?來勢洶洶定均速而來?
左、右線既前後方係d咩車?有咩事要轉線夠唔夠位?
鬧巿中記唔記得咩冧把巴士小巴埋邊個站?多唔多人落?睇唔睇到司機落晒客未?
車頭會唔會有人過馬路?賣早餐派報紙d位知唔知係邊?多唔多膠袋報紙隨處飄?
仲有好多好多
講緊既係觀察力、耐性
最重要係

將心比己、易地而處

泊車篇

泊車亦係好多新人遇到既問題,一係冇位,一係整爛野,有d仲連車都俾人整跌埋,真陰公
講真,小弟一向好少泊到骨位,不過就係憑住觀察力同一d所謂潛規矩,多年來相安無事,甚少被䦕單,不過愈來愈多既新人漠視前人為大家鋪好既路,自以為是,最終累街坊齊齊冇得泊,倒頭來仲要投訴這投訴那...香港抯車一向都係游走於灰色地帶,好多野無稜兩可,電單車就更係灰中之灰,好多問題只需兩個字就解決到:執生

泊骨位要有被搬車既準備,唔想被搬泊車時要考慮兩邊預留空間是否適當,太多太小都唔好
學識搬車,唔識既唔好去旺區骨位,唔係要搬人車,而係出車時被困自救
車多位少時大家遷就一下,見人地車入到但唔夠位落側架而搬開dd果種,睇開d啦
儘量唔好”頭入”,你”頭入”時冇咩車泊一件事,多車時架架偏左你偏右時相當黑人憎,出車亦有困難
冇位時會泊出界,留意唔好泊埋入隔離私家車錶位,找死
骨位旁既行人路好多時都隻眼開隻眼閉,不過留意一係貼欄杆一係貼牆泊,兩邊泊到人行唔到既就...
上落行人路儘可能推,唔推都唔該有咁慢得咁慢,先讓人行再剷上
用口代替響按,有人時不妨不斷講”唔好意思~唔好意思~"
就算平衡到,最少左腳一定要垂下,減低行人戒心
低波少油前行,遇阻寧願停埋一邊讓人行先,唔好呼油
泊後巷唔係就咁停低落架就算,最好先落車,再將車倒後儘量推貼牆邊,唔好阻人
唔好泊人地門口、樓梯口、電錶房甚至水錶都免,特別係電力公司果d電壓房,佢地入唔到去係絶對會報警的,我見過
泊後巷跟前人方向,泊開一邊就一邊
與前車距離半個至一個車胎既距離,大家夠位出車
熱門後巷大家泊貼d,泊多一架得一架
留意後巷是否食肆酒樓後門,會有大型送貨及垃圾木頭車經過,殺傷力強大, 要泊得有咁貼得咁貼
唔好泊近轉角位,人地唔夠位轉,一樣有殺冇賠
如果係返工長泊既,不妨同附近工作既人多打招呼,打好關係,亦可試探口風
鬼竄位唔駛大肆宣揚,愈黎愈多車泊只有等交地租(告票)


其實仲有好多野大家只要多加留意就會發現
例如
停車場閘口同燈位其實係有金屬感應器啟動閘口或轉燈
通常係地面會見到一個長方型
果四條邊就係
將車既機器部份駛近邊位就可啟動
唔駛"un"架!

(待續)

[ 本帖最後由 faytong 於 20-6-2012 03:51 PM 編輯 ]

評分

參與人數 13積分 +535 收起 理由
B12 + 50 賺人熱淚
VTECIII + 50 值得剪存
sky + 96 玩盡佢
jobyiu + 30 值得剪存
elt + 50 肥東好野~ :em53:

查看全部評分

 樓主| 發表於 14-1-2015 14:28:08 | 顯示全部樓層
原帖由 ivy321 於 13-1-2015 20:56 發表
聽講東東做左爸子了

發表於 17-5-2012 00:28:42 | 顯示全部樓層
原帖由 faytong 於 17-5-2012 12:14 AM 發表
眼見現時學習駕駛電單車既朋友越黎越多,電單車又越黎越多,相對地新人新車亦引發出種種現象、問題甚至磨擦,小弟係樹想向各位新知舊雨分享一下個人見解,岩聽既岩聽,唔岩聽當我冇講過。

http://www.iBike.com.hk/03_knowledges/03/choose_bike_rule.htm
...


仲有樣,文筆輕鬆有趣,可以從笑中學習。
 樓主| 發表於 17-5-2012 01:37:49 | 顯示全部樓層
係廳訓著左...

死link已刪
另預備左有關揀車,裝備,法例,泊車及最想講既”26灰色之道”
請多多支持

[ 本帖最後由 faytong 於 17-5-2012 01:44 AM 編輯 ]
發表於 17-5-2012 04:03:15 | 顯示全部樓層
支持支持
發表於 17-5-2012 06:21:08 | 顯示全部樓層
發表於 17-5-2012 06:49:30 | 顯示全部樓層
-
發表於 17-5-2012 08:16:12 | 顯示全部樓層
留名跟進
發表於 17-5-2012 08:27:30 | 顯示全部樓層
  袋錢落袋
發表於 17-5-2012 09:44:25 | 顯示全部樓層
發表於 17-5-2012 09:48:48 | 顯示全部樓層
發表於 17-5-2012 11:07:49 | 顯示全部樓層
原帖由 faytong 於 17-5-2012 01:37 AM 發表
係廳訓著左...

死link已刪
另預備左有關揀車,裝備,法例,泊車及最想講既”26灰色之道”
請多多支持

直頭畢生受用。。。
阿媽阿爸都唔會教我既野。。。

令人滾動
發表於 17-5-2012 11:30:09 | 顯示全部樓層
發表於 17-5-2012 11:42:37 | 顯示全部樓層
 樓主| 發表於 17-5-2012 12:15:02 | 顯示全部樓層
原帖由 囧? 於 17-5-2012 11:07 發表

直頭畢生受用。。。
阿媽阿爸都唔會教我既野。。。

令人滾動

班門弄斧
悶極無聊獻下醜姐
發表於 17-5-2012 14:01:50 | 顯示全部樓層

鐵騎網誌 iBike

GMT+8, 16-12-2017 02:59 PM

快速回復 返回頂部 返回列表